HALMASHAURI YA WILAYA YA CHUNYA YATANGAZA NAFASI 14 ZA AJIRA

CHUNYA, MBEYA: Halmashauri ya Wilaya ya Chunya imetangaza nafasi 14 za ajira kwa Watanzania wenye sifa, katika kada mbili ambazo ni Dereva Daraja la II na Mwandishi Mwendesha Ofisi Daraja la II.

Tangazo hilo limetolewa na Mkurugenzi Mtendaji wa Halmashauri ya Wilaya ya Chunya tarehe 31 Agosti 2026, likiwa na Kumbukumbu Na. CDS/S.10/39 VOL IV/22, baada ya Halmashauri hiyo kupata kibali kutoka Ofisi ya Rais, Menejimenti ya Utumishi wa Umma na Utawala Bora kwa ajili ya kujaza nafasi hizo.

Kwa mujibu wa tangazo hilo, nafasi tisa (9) zimetengwa kwa ajili ya Dereva Daraja la II, huku nafasi tano (5) zikiwa za Mwandishi Mwendesha Ofisi Daraja la II, na kufanya jumla ya nafasi zinazotangazwa kuwa 14.

Nafasi tisa za Dereva Daraja la II

Waombaji watakaopata nafasi ya Dereva Daraja la II watakuwa na jukumu la kuhakikisha magari ya Halmashauri yanakuwa katika hali salama na yanafanya kazi kwa ufanisi.

Miongoni mwa majukumu ya Dereva Daraja la II ni kukagua gari kabla na baada ya safari ili kubaini hali ya usalama wa gari, kuwapeleka watumishi katika maeneo mbalimbali kwa ajili ya safari za kikazi, pamoja na kufanya matengenezo madogo madogo ya gari.

Dereva pia atawajibika kutunza na kuandika daftari la safari, maarufu kama log book, kwa safari zote, kukusanya na kusambaza nyaraka mbalimbali, kufanya usafi wa gari na kutekeleza majukumu mengine atakayoelekezwa na msimamizi wake.

Kwa upande wa sifa, mwombaji wa nafasi ya Dereva Daraja la II anatakiwa kuwa na Cheti cha Kidato cha Nne (Form IV) pamoja na leseni ya Daraja E au C ya uendeshaji magari.

Aidha, mwombaji anatakiwa kuwa amelifanyia kazi daraja hilo la leseni kwa muda usiopungua mwaka mmoja bila kusababisha ajali, pamoja na kuwa na vyeti vya mafunzo vilivyompatia sifa ya kupata madaraja hayo ya leseni.

Pamoja na sifa hizo, mwombaji anatakiwa kuwa amehudhuria mafunzo ya msingi ya uendeshaji magari (Basic Driving Course) yanayotolewa na Chuo cha VETA au chuo kingine kinachotambuliwa na Serikali.

Nafasi ya Dereva Daraja la II imeainishwa katika ngazi ya mshahara TGS B.

Nafasi tano za Mwandishi Mwendesha Ofisi Daraja la II

Halmashauri pia imetangaza nafasi tano za Mwandishi Mwendesha Ofisi Daraja la II, ambao watakuwa na majukumu mbalimbali ya kiutawala na uendeshaji wa shughuli za ofisi.

Kwa mujibu wa tangazo hilo, majukumu ya mwandishi huyo ni pamoja na kuchapa barua, taarifa na nyaraka za kawaida na za siri.

Pia atawajibika kupokea wageni, kuwasikiliza kuhusu mahitaji au changamoto zao na kuwaelekeza sehemu wanapoweza kupata msaada.

Majukumu mengine ni kutunza taarifa na kumbukumbu za matukio, miadi, wageni, tarehe za vikao, safari za Mkuu wake pamoja na ratiba nyingine za kazi.

Mwandishi Mwendesha Ofisi pia atatakiwa kutafuta majalada na nyaraka zinazohitajika katika utekelezaji wa majukumu ya kazi, kupokea majalada na kuyasambaza kwa maofisa walio katika Idara, Kitengo au Sehemu husika.

Aidha, atakuwa na jukumu la kukusanya, kutunza na kuyarejesha majalada na nyaraka katika sehemu zinazohusika, kupanga dondoo na kufanya maandalizi ya vikao mbalimbali pamoja na kuandaa orodha ya mahitaji ya ofisi.

Kwa upande wa sifa za mwombaji, Halmashauri imesema anapaswa kuwa na elimu ya Kidato cha Nne (IV) au Kidato cha Sita (VI) na kuwa na cheti cha mtihani wa kiwango hicho, pamoja na Stashahada ya Uhazili au Cheti cha NTA Level 6 cha Uhazili kutoka chuo chochote kinachotambuliwa na Serikali.

Mwombaji pia anatakiwa kuwa amefaulu somo la Hatimkato ya Kiswahili na Kiingereza kwa maneno 100 kwa dakika moja.

Vilevile, anatakiwa kuwa amepata mafunzo ya programu za kompyuta za ofisi, zikiwemo Word, Excel, PowerPoint, Internet, Email na Publisher.

Nafasi ya Mwandishi Mwendesha Ofisi Daraja la II imeainishwa katika ngazi ya mshahara TGS C.

Masharti ya jumla kwa waombaji

Halmashauri ya Wilaya ya Chunya imeweka masharti ya jumla ambayo yanapaswa kuzingatiwa na waombaji wote wa nafasi hizo.

Kwa mujibu wa tangazo, waombaji wote wanapaswa kuwa raia wa Tanzania na wenye umri wa kuanzia miaka 18 hadi miaka 45.

Waombaji wenye ulemavu wamepewa nafasi ya kuomba na wanahamasishwa kufanya hivyo. Hata hivyo, wanatakiwa kuainisha aina ya ulemavu walionao katika mfumo wa kuombea ajira ili kuwezesha taarifa zao kutambuliwa na Sekretarieti ya Ajira katika Utumishi wa Umma.

Waombaji wote wanatakiwa kuambatanisha maelezo binafsi yaliyojitosheleza (Detailed Curriculum Vitae) yenye anuani inayotumika, namba za simu zinazopatikana, anuani ya barua pepe pamoja na majina ya wadhamini watatu wa kuaminika.

Kwa waombaji ambao tayari ni Watumishi wa Umma na wamejipatia sifa za kuingia katika kada tofauti na walizonazo, wanatakiwa kupitisha barua zao za maombi ya nafasi ya kazi kwa waajiri wao ili waajiri hao wajiridhishe ipasavyo.

Tangazo pia linaelekeza kuwa maombi yote yaambatane na vyeti vya elimu na taaluma vilivyothibitishwa na Mwanasheria au Wakili.

Vyeti vinavyotakiwa ni pamoja na vyeti vya Kidato cha Nne na Kidato cha Sita kwa wale waliofikia viwango hivyo, pamoja na vyeti vya kuhitimu mafunzo mbalimbali kulingana na sifa za kazi husika.

Halmashauri imetaja pia nyaraka zinazoweza kuhitajika kulingana na kiwango cha elimu na taaluma cha mwombaji, zikiwemo Postgraduate, Degree, Advanced Diploma, Diploma na Certificates, cheti cha mtihani wa Kidato cha Nne na Kidato cha Sita, cheti cha kompyuta pamoja na vyeti vya kitaaluma kutoka katika bodi husika.

Aidha, tangazo limeweka msisitizo kwamba testimonial, provisional result, statement of result pamoja na hati na matokeo ya Kidato cha Nne na Kidato cha Sita (Form IV and Form VI Results Slips) hazitakubaliwa.

Kwa waombaji waliosoma nje ya Tanzania, wanatakiwa kuhakikisha kuwa vyeti vyao vinahakikiwa na kuthibitishwa na mamlaka husika, ambazo ni TCU, NECTA na NACTE, kwa kuzingatia aina na kiwango cha elimu walichopata.

Halmashauri pia imeeleza kuwa waombaji ambao wameastaafishwa katika Utumishi wa Umma hawaruhusiwi kuomba nafasi hizo isipokuwa wawe na kibali kutoka kwa Katibu Mkuu Kiongozi.

Aidha, waombaji ambao tayari wameajiriwa katika nafasi za kuingilia katika Utumishi wa Umma hawaruhusiwi kuomba nafasi hizo na wanatakiwa kuzingatia maelekezo yaliyo katika Waraka Na. CAC.45/257/01/D/140 wa tarehe 30 Novemba 2010.

Tangazo limeonya pia kuwa waombaji watakaowasilisha taarifa au sifa za kughushi watachukuliwa hatua za kisheria.

Mwisho wa maombi

Halmashauri ya Wilaya ya Chunya imesema mwisho wa kutuma maombi ya kazi ni tarehe 13 Septemba 2026.

Waombaji wameelekezwa kuhakikisha wanaambatanisha barua yao ya maombi ya kazi iliyosainiwa pamoja na vyeti vya elimu.

Barua ya maombi inapaswa kuelekezwa kwa:

Mkurugenzi Mtendaji,
Halmashauri ya Wilaya ya Chunya,
S.L.P 73,
Chunya.

Hata hivyo, maombi yote yanatakiwa kuwasilishwa kwa njia ya kielektroniki kupitia mfumo wa Ajira (Recruitment Portal) wa Sekretarieti ya Ajira katika Utumishi wa Umma.

Waombaji wanatakiwa kutumia mfumo huo kupitia anuani ya Recruitment Portal ya Serikali, ambayo pia inapatikana kupitia tovuti ya Sekretarieti ya Ajira kwa kuingia sehemu iliyoandikwa Recruitment Portal.

Tangazo hilo pia linapatikana kwenye tovuti ya Halmashauri ya Wilaya ya Chunya pamoja na tovuti ya Sekretarieti ya Ajira katika Utumishi wa Umma.

Halmashauri imeonya kuwa maombi yatakayowasilishwa nje ya utaratibu ulioainishwa katika tangazo hilo hayatafikiriwa.

Kwa mawasiliano, Halmashauri ya Wilaya ya Chunya imetaja anuani yake kuwa Itigi Road, S.L.P 73, Chunya, huku namba za simu zikiwa 025 2520121, barua pepe ikiwa [email protected], na tovuti ya Halmashauri ikiwa www.chunyadc.go.tz.

Tangazo hilo limetolewa na Mkurugenzi Mtendaji (W) wa Halmashauri ya Wilaya ya Chunya, likiwa na tarehe 31 Agosti 2026.